د زړه پنجره کې قيد، محبتونه وو، ښه نه وو
د ښار د ښکلو يو، دوه عادتونه وو، ښه نه وو
يا سم د سر نه تير شې يا د مال په دغه ښار
د مينې د اثبات ضرورتونه وو، ښه نه وو
له کبره يې وزرې شوې پيدا، د ستمګرو
په شونډو د هر چا يې صفتونه وو، ښه نه وو
څهرې عاجزانه وې، د دې ښکلو مګر ها!!!!
ساتلي چې سينه کې يې کوم زړونه وو، ښه نه وو
دا ځکه ناګهانه به راياده شوې، ما ستا
د زړه طاخچه ايښي تصويرونه وو، ښه نه وو
غاښونه د غصې درته هر چا چيچل وحيده
تراخه دې د ګفتاره حقيقتونه وو، ښه نه وو
وحیدالله ودان
Comments
Post a Comment